viernes, 3 de agosto de 2012

BRAKK ZANG - INSURGENTE




Marra naranja lehen saiakera. Marra urdiña bigarren saiakera.
Marra gorria Insurgente.



BALTISTANGO ERREKAK
   Eskalalada bidai baten planteamendua, eta objektiboa, taldea osatzen dutenen izaeran eta, alpinismo mahaian kokatu beharra dago. Partaideen tenperamentua ezagututa bidaiaren proposamena egin daiteke. Partaideen eskalada mahila jakin ezkero helburu lojiko bat adostuko da. Era horretara ziur egon gaitezke bidaia ondo aterako dela,  hiru baldintza hauek betzen direla; etxera onik itzuliko garela, lagun bueltatu behar dugula, eta gailurra zapaldua izan dela.



   Raul Gonzalez, Avilako Santa Cruz del Valle herrian jaiotakoa da. Gredoseko haitzak izan ditu eskalada ikas leku. Aspalditik ezagutzen dugu elkar, Marokon egin genuen topo lehendabiziz, Todra sakanean, gabon berezi batzuetan. Patagoniako Paine erdi dorrean Intsumisioa bidean parte hartu genuen biok 1996 urtean. Naturazale amorratua, basozaintza du ogibide.



   Bizitzaren gorabeherak direla eta, urteak generamatzan elkarrekin atera gabe. Aurten behar zuen izan. Pakistango haitzak izango ziran berrelkartze tokia. Ideia garbia generaman, bidaia arina eta askea izan beharra zuen.  Ez genuen nahi eskalada baimenik ordaintzen zen tokirik, honek bidaia asko baldintzatzen bai du. Nagma bailarak biltzen zituen guk eskatze genituen baldintzak.         Baltistango  Ganche eskualdean, Kanday bailaran, Kande herriaren gainean dago Nagma. Inguru irekia “ open zone “ bezala dago sailkatua lekua. K6 mendiak hartzen du bailara bukaeran ohorezko tronua. Amin Brakk, Changui tower, Hashun tower, Singu Charpa, Brakk zang… daude bertan. Mendi kontuetatik kanpo, inguruak garrantzi handia dauka Kande herriaren ekonomian, bertan ehunka behiak larre hartzen dute.



   Ingurugiro bezala, lekua, aparta dela esango nuke. Naturaren edertasuna apartekoa da. Eskalada aldetik ez zait hain erreza egiten sailkatzea. Haitza ez da kalitate osokoa, granito harria erraz “ deskontsatzen “ da. Hemen ahaztu beharra ditugu etxeko ohiturak. Kontu asko atera beharra dago gorantz hasi orduko.  

LEHEN SAIAKERA
(Egunerokoa)
   Saiatu gara Brakk Zang hego paretan bide berri bat sortzen. Derrigorrezko aklimatazio desatsegina igaro eta paretara serio sartzeko unea zela pentsa genuen. Petate batekin sartu ginen, jana, ura eta lotarako erropeekin hornitua. Eskaladarako bi soka generamatzan, eta petatea igotzeko 5,5 mm auxiliarra. Bidea 6c luze batetik hasten da. Luze hau zabaldua zegoen, lau txapa topatu genituen tiradan. Jon eta Fixe markakoak direnez txapa hauek, espainiako talde batek zabaldua izango zela pentsa genuen. Hortik aurrera ez genuen material eta arrasto gehiagorik aurkitu. Bigarren luzean Raulek hiltzea eta parabolt bat utzi zituen jarriak. Parabolta sartzeko bi ordu pasa behar izan zituen. Hemendik haurrera ez genuen material gehiagorik utzi. Gaua zazpigarren erreunioan egin zitzaigun. Vivac oso deserosoa igaro genuen. Egun horretan zehar bitan egin zigun euria, gauean ere bustialdi ederra hartu genuen. Goiz hasi ginen eskalatzen hurrengo egunean. Petatea zortzigarren bileran utzi genuen, puntu horretatik aurrera sokada arin bat bezala mugitzeko asmoarekin.






Raul laugarren luzean




    Hamargarren bilerara iristeko diedro eder bat eskalatu beharra dago, 6C+ on bat. Bileran hiltze bat topatu genuen. Gailurra bide berri batetik zabaltzeko asmoa zapuztu zitzaigun. Hurrengo tiradan plaka batetan espit bat zegoen. Guk eskumatara utzi  genuen epita eta zuzen jo genuen arrakala perfektu batzuetara. Artifizialean bi luze motz eskala eta gero, non topatzen dugun beste bilera bat, espit bat fisurero eszentriko batekin. Irteerarik gabeko puntu batetan geunden, gorantz oso liso zegoen. Ezkerretara pendulu bat eginez diedro itsu batetara iriti giñen. Handik aurrera tiratzeko bilera bat munta behar izango genuen parabolta sartuz. Erramienta guztia petatean utziak geneuzkan, eta gainera ez genekien norbait espitak sartu gabe pasatua zen. Rapel egin genuen plakako espiterarte. Eskumatara tiratzen dugu eta soka fijo batzuekin topo egiten dugu. Haitz pañoaren itxura ez zen polita, ez zigun asko motibatu hortik aurrera segitzeak. Bertan behera utzi genuen gorantz joateko saioa, eta rapelatzen hasten gara igotako bidetik. Petatea jasotzen dugu utzitako bileratik, eta beheruntz jarraitzen dugu guk irekitako bidetik, errapel guztiak harkaitz pikoetatik egin genituen, kordino eta zintak utziaz.

Bibakarako pretatzen.


Bibak ezeroso baten ondoren.

Diedro ederra gainditu ondoren

EGURALDI ALDAKETAREN ZAIN
(Egunerokoa)
   Beste garai batetan gaude. Dirudi denboran bidaiatzea posible dela. Fairek, Kandeko artzainak, esker onez  Balti ogi bat eta Rosti “ txapati prejitua ” oparitu digu. Guk eskerrik beroenak emanez hartu dizkiogu.

   Goiz abiatu gara gaur. Egunsentiarekin Fairen behi ernalduaren bila ibili gara glaziarreko morrenatik gora eta bera. Azkenean errekaren beste aldeko basotxoan topa dugu ezkutatua. Pozik jaitsi du bere behia Kande herrira.


   Atzo ezagutu genituen Faire eta bere lehengusua karin. Behietara etorri ziran eskopeta hartuta. Hiru uso bota zituen Kariñek. Irribarretsu gerturatu zitzaizkigun beraiek dastatzeko gonbitearekin. Guk adi segitu genuen otorduaren prestaketa. Gauza sinple hori festa bat zen guretzako.


   Fairek gure sukaldeko plastikozko toldoaren azpian lo egin du. Arropa pixka bat utzi genion gaua pasatzeko. Ederki lo egin duela esan digu. Berandutu egin zitzaion atzo eta ezin zuen jaitsi bere behirik gabe.Beste gau bat ere egingo zuen plastikoaren azpian bere behiarengatik. Bihotzez eman digu ogia. Gogoz hartu diogu oparia.


BIGARREN SAIOA
(Egunerokoa)
   Bide berri bat zabaltzeko aukera oraindik or dugu. Lehen saioan zortzi luze berri egin genitun, gero, eskuinera hartuz diedro markatu batetik bloke liso batetara iritsi giñen arte. Orain, zortzigarren bileratik ezkerretara jotzeko asmoa dugu.

Mikel bederatzigarren tiradan
 Arratseko hiruretan azken puntu horretan, zortzigarren bileran, gara berriro. Oraindik argi dezente dugu aurretik, eguraldia ere ona da. Zertarako biharko utzi? nork daki zer eguraldi izango dugun bihar, paraje hauetan eguraldiak ziurtasun gutxi dauka. Lotarako gauzak zortzigarren bileran utzi ditugu, azkar hasten gara berriro eskalatzen. Bederatzi garren bilera haitz piko batetan muntatzen dugu. Hurrengo tirada hasi orduko ikusten dugu beste bilera bat zegoela muntatua gure bileratik bost metro ezkerrerago. Guk segitu nahi genuen aukera hau ere zabaldua dago. Zer egin behar dugu, saiatu gara bide berri bat sortzen, gailurra da oraingoan garrantzitsuena.





   Pozez iritsi gara puntara, ilusio handia egin digu bloke malkorra ukitzea. Pakistanen proiektuak bukatzea ez da erreza. Ain da gogorra dena.
Gailurrera iristen

Amin Brakk gailurretik.
   Azken argiarekin iritsi gara zortzigarren bilera bibakera, errapelak ongi joan dira, gustoz irentsi dugu geratzen zaigun azken txorizo paketea, eta era bat nekatuak sartu gara lo zakuetan.


   Goizeko lehen argiarekin ekin diogu jaitsierari. Ez gara gure bidetik jaitsi, errapel linea bat aurkitu dugu, ezagutu ez arren horrela erabaki dugu. Damutu gara, nahiz eta bilerak espit eta mosketoiaz hornituak egon, sarritan trabatu zaizkigu sokak bloke eta arrakaletan.


   Beraz gure marra bariante bat da. Ikusirik zer bide dauden inguruan, nire iritziz, Insurgente bidea aukera polita da gailurrera librean igotzeko. Egunen batetan animatze bazarete paraje haietatik eskalatzeko, kontuan izan bide hau.


  BIDEEN KOKAPENA
   Pareta honetan dauden bidei buruzko informazio gutxi dago. Guk arrasto hauek topatu genituen, bide haierak dira. Zailtasunei buruz nork daki.
1-Czech start...5.10/A2 450m 2- Ganyips A3/6a 540m 3- Crakistan 5.12d/A3 500m 4- ¿?
5- ¿? 6- ¿? 7- ¿? 8- Variante insurgente 7a/A1 400m 9- ¿?

2012-ko PREZIOAK
   Hauek dira 2012-ko uztailan topatu ditugun prezioak. Orientatibo moduan hartu, hemen gehiena negoziagarria izan daiteke.
·         Kanbioa 1€-------------112 rs
·         Taxia Aeroportua- pirwarahi bus station ------ 700rs
·         Autobus Islamabad- Skardu-------------- 2200rs
·         Hotela Concordia Skardu gela bikoitza------------ 1400rs
·         Jeep Skardu- Kande------------ 8000rs
·         Porteadorea Kande- Nagma------------ 560rs eguna. Hiru egun daude estipulatuak. Bi gora eta bat bera------------------ 1680rs. Guk 2000rs eman dizkiegu bakoitzari.